Like-o-Meter
[Total: 0 Average: 0]
ఇవ్వాల్టి మనిషి
నిర్లిప్తత కప్పుకు నిద్రపొతున్న వెసూవియస్ నో
చిరునవ్వు ఉపరితలం కింద
పొగలుకక్కుతున్న సప్తసముద్రాల పాదారసాన్నో
చిటపటలాడే నిప్పురవ్వలను గుప్పిట్లో బిగించి
శరవేగంతో చుట్టుకుంటున్న అగ్నికీలల్ను
లోలోనే అదిమి పట్టి
ఆకుపచ్చ వెలుగుల్ను గుమ్మరించే
అడవితల్లినో
ఆటవిక స్వభావాన్ని సింహ గర్జ్జనల రౌద్రాన్నీ
సౌమ్యతలో మూటగట్టి అటకెక్కించి
లోలోపల మాత్రం
అవిశ్రాంతంగా అల్లుతున్న సాలెగూళ్ళు.
ఇక్కడ వన్ మాన్ షోలో
నూటికి నూరు శాతం
అత్యుత్తమతకోసం సతమత మవుతూ….
ఊపిరాడని ఊబిలో ఉక్కురిబిక్కిరవుతున్నా
చుట్టూ సుందర ప్రపంచమీద
గుప్పిళ్ళ కొద్దీ బురద జల్లుతూ
ఎప్పుడో ఏదో ఒక క్షణంలో
విస్ఫోటించే సత్యానికై ఎదురుచూస్తూ…..