ధూపం

కసిదీరా మూడు దమ్ముల్లో

కాల్చిపారేసిన సిగరెట్టు

యాష్ ట్రేలో ఆఖరి శ్వాస వదులుతుంది

దీని త్యాగాన్ని ఊరకే పోనీను.

ఊపిరితిత్తుల్లో భద్రంగా దాచుకుంటాను.

స్లో మోషన్ లో చావును అనుభవిస్తున్నా

జాస్మిన్ నవ్వు నాకింకా గుర్తున్నదంటే

గ్లాసులా తెరుచుకున్న గొంతులో

గిరికీలు కొడుతున్న షివాస్ రీగల్ కారణం కావొచ్చు

సిల్లీగా ఊదిన సిగరెట్ పొగా కావొచ్చు.

పాయిజన్ పరిమళంకన్నా మత్తెక్కించే రాత్రి నిషా

పరస్పర పరామర్శల తర్వాత

సీసాలా పారదర్శకమైనప్పుడు

సానికొంపలా తెరుచుకున్న ఆకాశంలోకి

పగలబడి నవ్వుకుంటూ

సూర్యుడిలా బయటకు వచ్చి

మళ్ళీ సూర్యుడిలానే లోపలికీ వెళ్తాను

ప్రపంచమంత యాష్ ట్రేలో దగ్ధమౌతూ

చితాభస్మాన్ని చీకటికి పూస్తూ….