కరాచీ వీధులు

1
మొదటి సారి వొచ్చినా
మొహాలన్నీ పరిచయమున్నట్లుగానే వున్నాయి –

ఈ పుర వీధులు
నా కేమీ కొత్తగా కనిపించడంలేదు –

అద్దంలో నా మొహం నాకే కనిపించినంత నిజంగా
అన్నీ సొంత బజారు కరచాలనాలే –

చిన్నప్పుడు తప్పిపోయిన బాల్య స్నేహితులు

ఎదురుపడి పలకరించి బాహువులు పరిచినట్లే వుంది –

కానీ ,
అత్యంత విషాదమేమిటంటే

మా అమ్మమ్మ కనిపినంచడం లేదు,

బహుశా మరణించింది కాబోలు –
బాల్య ప్రేయసీ నన్ను గుర్తించడం లేదు ,

బహుశా మరొకరిని ఇష్టపడుతుంది కాబోలు –

2

ఎంతయినా అతిథిని మాత్రమే కదా !

మళ్ళీ రాకపోవొచ్చు , వొచ్చినా ఎవరూ గుర్తించక పోవొచ్చు ,

నా పుత్రుడికి కానుకగా కరాచీ యాత్ర మరియూ కాశీ యాత్ర

అను రెండు కవితల్ని మాత్రం అంకితం ఇవ్వగలను !

3

నిజం చెప్పనా !

నాల్గు తరాల కిందట త్యజించిన భారాన్ని

వెతికి వెతికీ మళ్ళీ భరించడానికి ఘర్ వాపసి రోజు
ఎంతో దూరం లేదనిపిస్తూంది –

*****

నా చిరకాల అంతరంగిక మిత్రులు కడప రఘోత్తమ రావుకు  ప్రేమగా ….

—–ఇక్బాల్ చంద్