నిష్ఫల జీవితం

నీళ్ళు నిండిన గుంతలా
లోతెరుగని మనసుతో
యెన్నాళ్ళిల్లా బతికేది?

చెప్పాపెట్టకుండా కురిసే వానను
గుప్పిట్లో బంధించాలనే వో జీవితకాలపు వాంఛని
రెప్పలకి అంటించి తిరిగినా
ఫలించని ఆశ.

ఎన్నిసార్లు దాటినా అదే మైలురాయి
కళ్ళల్లో కళ్ళు పెట్టి చూస్తుంటుంది
ఉసూరుమనే ప్రాణాలు
ఆ పక్కనే వున్న చెరువులో బుడగల్లా తేల్తాయి

మచ్చలేని గోడ మీద
బట్టల్లేని పిల్లదాన్నొకదాన్ని
వాల్ పోస్టర్లా అంటించి
వెళ్ళిపోతాడొకడు.

అభిప్రాయాల్లేని నిష్ఫల జీవితానికి
చిట్కా వైద్యం పెద్ద వూరట