ఉత్థాన ఏకాదశి విశిష్టమైనది. కార్తీకశుక్ల పక్షమున ఉన్న పండుగ, నోము ఇది. ఉత్థాన ఏకాదశికి నాలుగు పేర్లు కలవు – (1) హరిబోధిని; (2) ప్రబోధిని; (3) దేవోత్తని; (4) ఉత్థాన ఏకాదశి.
ఉత్థానఏకాదశిన నెమలిఈకలను (peacock feathers) దానము చేయుట పుణ్యప్రదము.
బర్హిపింఛధారి
ఆ అందచందముల చూసితే చాలని
అంటారు ఎల్లరూ!
చాలు! చాలనుచును – చాల కోరికలు గద!
ఎలమి ఈ లోకులందరికిని!
శిఖిపింఛధారిని దర్శించాలని – అందరికి ఆపేక్ష ||
నెమలి పింఛమ్ములను నీ బర్హిలోనుండి
కోమలముగా వలిచి ఇవ్వవమ్మా కేకి!
ఈ రోజు మంచిది, నీకు పుణ్యము దక్కు!
ఉత్థాన ఏకాదశి! నేడు ఉత్థాన ఏకాదశి! ||
పింఛములు కాసిన్ని మాకివ్వవోయీ! నెమలి!
నీ వన్నె ఈకలు కొద్దిగా చాలును
మారాము చేయకే ఓ మయూరి!
ఎవ్వారి ‘చాలు’ ఈ పెంకితనము;
నీకిట్లు కలిగేను చెప్పవమ్మా! ॥
నాణెమైన ఈకలివ్వమ్మ నువ్వు
వెన్నెల, హరివిలులు, కన్నయ్య నగవులు
వెల్లివిరియును అందు, అందుకోగలవీవు!
ఉత్థాన ఏకాదశి, నేడు ఉత్థాన ఏకాదశి! ||
చాలు = పోలిక; చాళ్ళు = పోలికలు