జయ జయ భారత ధాత్రీ మాతకు
జయ జయ భారత సంస్కృతికి
జయ జయ లక్షణ సంపద్భరితకు
జయ జయ జ్ఞానపు వార్నిధికి
విదేశీ వనిత స్వదేశ జనతకు – పదాధికారిగ నిలబడగా
అధీరమవదా అఖండ భారత – స్వతంత్ర్య మానస ధీశక్తి
ఆంధ్రభోజుడు, ఛత్రపతులను – పుత్రుల బడసిన ధాత్రి ఇది
మందభాగ్యులై అంధకారమున నిందలు వేయుట తగదింక
వేదములందున శోధన జరిగెను – మానవ సాధన మార్గముల
రోదనలేలనో, వాదనలేలనో – ఒప్పరే సోదరి సోదరులు!
బీదలు నిండిన దేశము కాదిది – వీధిని రత్నపు రాశులను
మోదము మీరగ, మతులే పోవగ – రాశిగ అమ్మిన దేశమిది
ఘన పాషాణంబులనే దొలచి – సుందర కుడ్యమ్ముల మలచి
సడలని జడముల అడుగున దాగిన లాలిత్యపు జాడల తెలిపి
బీటలు వారిన కోటల గోడలు – చాటి చెప్పవే ఆ కథనాల్
చోటును ఇచ్చిన వచ్చిన చేటును – మరచిపోవుటే తగదింక!
హ్యారీపాటర్, గోరీ హంటర్ – వంటి వేలం వెర్రులకు
జంతుజాలమే నీతిని చెప్పిన – పంచతంత్రమే అగుపడదే!
మనలో ఇంకా మసలుతువున్నాయ్ – బానిస మానస భావనలు
కనులే తెరచి కనగా నేర్చిన – మనగలమింకను మానవులై
ఉత్తిష్టోత్తిష్టంబని పలికిన – అంతర్వాణికి స్పందించి
శిష్ట భావనల స్పష్టపరచ్చు – దృష్టంబయ్యెను ఈ పాట
తిరోగమనమో తిర్యక్ భావమో – కాదు కాదులే ఈ పాట
పురాకృతంబగు పుణ్యవిశేషపు – రాగోద్ధతియే నా మాట
||జై హింద్||